Հայհոյանքը քրեականացնող օրենքի ուժի մեջ մտնելուց մինչ օրս քննչական կոմիտեում ծանր վիրավորանք հասցնելու դեպքի առթիվ մեկ քրեական գործ է հարուցվել։ Այս մասին NEWS.am–ի գրավոր հարցմանն ի պատասխան հայտնեցին ՀՀ քննչական կոմիտեի տարածքային քննչական վարչությունների գործունեության վերահսկողության գլխավոր վարչությունից։
Քրեական գործը հարուցվել է Երևան քաղաքի քննչական վարչության Շենգավիթ վարչական շրջանի քննչական բաժնում՝ ՔՕ 137.1–րդ հոդվածի 2-րդ մասի 1–ին կետի հատկանիշներով։ Հիշյալ հոդվածը վերաբերվում է անձի վերաբերյալ ծանր վիրավորանք պարունակող նյութեր տարածելուն, որը՝ կատարվել է տեղեկատվական կամ հաղորդակցական տեխնոլոգիաներն օգտագործելով կամ հրապարակային այլ եղանակով։ Նշված հանցագործությունը պատժվում է տուգանքով` սահմանված նվազագույն աշխատավարձի հինգհարյուրապատիկից հազարապատիկի չափով:
ՔԿ–ից նաև տեղեկացրին, որ քրեական գործով նախաքննության տվյալ փուլում կասկածյալի կամ մեղադրյալի դատավարական կարգավիճակ ունեցող անձ չկա։Մեր տեղեկություններով՝ քրեական գործ հարուցելու առիթ է հանդիսացել անձի հաղորդումը՝ կապված ֆեյսբուքում իրեն հայհոյելու հետ։ Խոսքը հասարակ օգտատերերի մասին է և չի առնչվում պաշտոնատար անձանց։
Հիշեցնենք, որ հայհոյանքը քրեականացնող օրենքի փոփոխությունն ուժի մեջ է մտել այս տարվա օգոստոսի 31–ին։
Քրեական օրենսգրքում լրացվել է հոդված 137.1-ը, որը վերաբերում է ծանր վիրավորանքին։ Այս հոդվածով նախատեսված արարքները պատժվում են տուգանքով կամ կալանքով՝ մեկից երեք ամիս ժամկետով:
