Գեղարքունիքի մարզում նախընտրական հանդիպման ժամանակ այսօր վարչապետի պաշտոնակատար Նիկոլ Փաշինյանն անդրադարձավ սահմանային խնդիրներին։ Նշենք, որ մայիսի 12-ից ադրբեջանական զինված ուժերը ներխուժել են ՀՀ տարածք՝ Գեղարքունիքի և Սյունիքի մարզերի մի շարք բնակավայրերի վարչական տարածքներ։
«Գեղարքունիքի մարզում և Սոթք-Խոզնավար հատվածում ստեղծված իրադրության մասին մենք մեր դիրքորոշումը հայտնել ենք։ Խնդիրը պետք է լուծվի խաղաղ ճանապարհով և մեր միջազգային գործընկերների ներգրավմամբ։ Այս օրերին մենք շատ ակտիվ քննարկումների և համագործակցության մեջ ենք Ռուսաստանի Դաշնության հետ։ Նրանք լայնորեն ներգրավված են, և մենք ըստ էության քայլ առ քայլ գնում ենք այդ խնդրի հանգուցալուծմանը»,- ասաց Փաշինյանը։
Նրա խոսքով՝ միաժամանակ սերտ աշխատանք է տարվում միջազգային այլ գործընկերների հետ՝ ԵԱՀԿ Մինսկի խմբի համանախագահության շրջանակներում։ «Բայց մեր անվտանգության խնդիրները պետք է լուծենք մեր բանակի հզորացմամբ։ Մենք պետք է անցնենք պրոֆեսիոնալ բանակի»,- հավելեց Փաշինյանը։
